Zâlimler el vurup hep şemşîr-i canrübâya
Kasdettiler serâpâ "Evlâd-ı Mustafâ"ya
Devrân olup müsâid ol kavm-i bî-hayâya
İysâl olundu bîdâd serhadd-i intihâya
Kimler eder tahammül yâ Rab bu ibtilâya
Âmâc edüp vücûdun bin nâvek-i kazâya

Düştü Hüseyn atından sahrâ-yı Kerbelâ'ya
Cibrîl var haber ver "Sultan-ı Enbiyâ"ya

Cûş eyleyüp belâya mânend-i mevc-i tûfân
Keştî-i "Ehl-i Beyt"i kıldı şikest ü vîrân
Maktûl olup serâser ashâb u âl-i zîşân
Yektârev oldu ol mâh çün âfitâb-ı rahşân
Her yandan etti savlet hınzîr-veş Yezîdân
Sertâbepâ vücûdun zahm eyleyüp kızıl kân

Düştü Hüseyn atından sahrâ-yı Kerbelâ'ya
Cibrîl var haber ver "Sultan-ı Enbiyâ"ya

Ashâb u âlinin hep kibârı vü sigârı
Bir bir kılıp şehîden azm-i huzûr-i Bârî
Dil-teng edüp susuzluk tâ Arş'a oldu sârî
Ezvâc-ı Tâhirât'ın feryâd-ı bî-karârı
Her yüzden etti tazyîk a'dâ o şehriyârı
Âhir çıkıp elinden dâmân-ı ihtiyârı

Düştü Hüseyn atından sahrâ-yı Kerbelâ'ya
Cibrîl var haber ver "Sultan-ı Enbiyâ"ya

Nutuk : Kazım Paşa
Beste : Sebilci Hüseyin Efendi
Makam   : Hüzzam / Muhabbet Başlangıç
Usul : Yürük Semai
Okuyan  : Hüseyin Sebilci Efendi